Háskóli Íslands

Skráning hafin á 17. ráðstefnuna um rannsóknir í líf- og heilbrigðisvísindum

Opnað hefur verið fyrir skráningu og móttöku ágripa fyrir ráðstefnu Heilbrigðisvísindasviðs um rannsóknir í líf- og heilbrigðisvísindum við Háskóla Íslands. Ráðstefnan fer fram í 17. skipti á Háskólatorgi dagana 5. og 6. janúar 2015. Ráðstefnunni er ætlað að kynna og miðla því sem er efst á baugi í líf- og heilbrigðisvísindum við Háskóla Íslands hverju sinni.

Ráðstefnan fór síðast fram í ársbyrjun 2013 og var þátttaka góð. Flutt voru rúmlega 180 erindi í 25 fjölbreyttum málstofum og 120 veggspjöld voru til sýnis.

Á dagskrá ráðstefnunnar í janúar verða málstofur, veggspjaldasýningar, spennandi gestafyrirlesarar ásamt opnum fræðslufundi fyrir almenning. Skipulag ráðstefnunnar verður með svipuðu sniði og áður en tvær breytingar hafa þó verið gerðar. Sérstök áhersla verður lögð á að málstofur á ráðstefnunni verði eins þverfræðilegar og hægt er til þess að tengja saman vísindafólk úr ólíkum greinum. Þá hefur einnig gerð sú breyting að ekkert þátttökugjald er á ráðstefnuna. Skráning er samt sem áður skilyrði fyrir þátttöku.

Heilbrigðisvísindasvið býður öllum sem stunda rannsóknir í líf- og heilbrigðisvísindum við Háskóla Íslands til þátttöku á ráðstefnunni en jafnframt samstarfsfólki þeirra í rannsóknum frá stofnunum utan HÍ.

Undirbúningur og framkvæmd 17. ráðstefnunnar er í höndum skrifstofu Heilbrigðisvísindasviðs og sérstakrar undirbúningsnefndar sem skipuð er af vísindanefnd sviðsins. Í undirbúningsnefndinni sitja Ágústa Guðmundsdóttir, prófessor við Matvæla- og næringarfræðideild, Fanney Þórsdóttir, dósent við Sálfræðideild og formaður nefndarinnar, Margrét Þorsteinsdóttir, dósent við Lyfjafræðideild, Páll Biering, dósent við Hjúkrunarfræðideild, Svend Richter, dósent við Tannlæknadeild og Sigurður Yngvi Kristinsson, prófessor við Læknadeild.

Skráning er, eins og fyrr segir, hafin og búið er að opna fyrir móttöku ágripa. Skilafrestur ágripa er til 15. október 2014.

Smellið hér fyrir nánari upplýsingar um skil ágripa.

Smellið hér til þess að skrá ykkur á ráðstefnuna.

 

Þú ert að nota: brimir.rhi.hi.is